| Танымал блогер Ырысбала Икрамбай атын жамылып ақшалай ұтыс ойнатқан мектеп оқушысын тапты. Ол “Ырысбаладан конкурс” деп жалған ойын ұйымдастырып, блогердің оқырмандарынан ақша жинаған. Бұл туралы Stan.kz ақпарат агенттігі хабарлайды. |
Қайырымдылық іс-шарасын ұйымдастырып, баспана алып беріп жүрген блогер алаяқты бірінші рет әшкерелеп тұрған жоқ.
“Бір күн ешкіммен ұрыспай, “он күнәнің тоғызы тілден” деген нақыл сөзді ескеріп, үндемей жүрейікші десек те мүмкіндік бермейді. “Конкурстан 100 мың теңге ұтып алдыңыз, 5000 теңге аударсаңыз, ұтысыңызды салып жібереміз” деп жалған конкурс жасап жатқан мектеп оқушысын тауып алдым. Шардара ауданы Көксу деген ауылдың тұрғыны екен. 2007 жылы туған, әлі мектепте оқиды. Адамның атын жамылып, менің абыройыма нұқсан келтірді. 5000 теңгесінен айырылған адам мені қарғайды. Мектеп оқушысының аты-жөні мен үйінің мекенжайы қолымда тұр. Бір-екі күнде Шардараға жолым түсіп тұр еді, істі аяғына дейін жеткіземін. Басқаларға сабақ болсын”, – дейді блогер.
“Қызым жылап жатыр. Бір жолға кешіріміңді берші. Алған ақшаның бәрін қайтарып береміз. Жергілікті полицияларды қозғамай-ақ қойыңызшы. Әкесі өте қатал еді, бұл туралы естісе, қиын болады” деп анасы жалынса да, кешірім бермейтінімді айттым. Одан кейін қызы да шықты, “алған ақшаны полицияның көзінше аударасың” дедім. Әке-шешесінен бұрын қыздың өзіне жазғанмын. Телефон тұтқасын көтермеді. WhatsApp-қа жазғанымда оқыды да, бұғаттап тастады. Қатты ашуланып кеттім. Басқа адамдарға сабақ болады. Мен жазбамның астына мені қаралап, даттап жазған оқырмандарымды да жазалап аламын”, – дейді Ырысбала.
Еске салсақ, Ырысбала 81-үйді тапсырғаннан кейін қайырымдылықпен айналыспайтынын айтқанын жазған болатынбыз.
