Алматы мен Ыстықкөл арасын жалғайтын жаңа жол салу жобасы қолға алынуда. LS тілшісі Көлік министрлігінен жаңа жол құрылысы туралы ресми ақпарат алды.
Министрліктің мәліметінше, қазіргі уақытта Алматы- Отар- Қордай-Бішкек-Чолпон-Ата бағытының ұзындығы 485 шақырымды құрайды.
Қазақстан мен Қырғызстан үкіметтері Алматы- Ұзынағаш- Кечи- Кемин бағыты бойынша балама жол салу мүмкіндігін қарастыруда. Жобаланған жаңа бағыттың ұзындығы шамамен 70-80 шақырымды құрайды, оның ішінде 6 шақырымы Қырғызстан аумағы арқылы өтеді.
Қазіргі уақытта жобаның экономикалық тиімділігін бағалау жұмыстары жүргізіліп жатыр. Бұл мақсатта Азия даму банкінің гранты негізінде техникалық-экономикалық негіздеме (ТЭН) әзірленуде. Құжатта болашақ жобаның негізгі параметрлері қамтылады: жолдың санаты мен ұзындығы, нақты бағыты, қаржылық моделі, трафиктің болжамды көлемі және ұсынылатын тариф мөлшері есепке алынады.
Техникалық-экономикалық негіздеме дайын болғаннан кейін, жоба мемлекеттік-жекеменшік әріптестік (МЖӘ) тетігі арқылы жүзеге асырылған жағдайда, екі ел арасында туындауы мүмкін құқықтық мәселелер жан-жақты талқыланатын болады.
Айта кетейік, бұған дейін Қазақстандық МЖӘ орталығы аталған жол құрылысының алдын ала құны $160 миллион асуы мүмкін екенін мәлімдеген. Сол кезде жолдың ұзындығы шамамен 85 шақырым деп көрсетілген еді.
